موجادله سیراسیندا گونده‌لیک اولایلارا قاپیلیب تک آماجی‌میزی اونوتمامالی‌ییق. میللی حرکتین هدفی، گونئی آذربایجان دولتینی یئنیدن قورماقدیر. آتدیغیمیز هر آددیم و سؤیله‌دیغیمیز هر سؤز، بیزی بو هدفه یاخینلاشدیرمالیدیر. گونئی آذربایجان میللی حرکتی، ایران رژیمی‌نین ایچریده و دیشاردا اولان اوپوزیسیونو ایله عینی هدفی گودمور. اونلار ایران و ایران دولت‌چیلی‌یینی قورویوب، داها گوجلو ائتمک اوچون، رژیمین ده‌ییش‌مه‌سینی ایسته‌ییرلر. اونلار یالنیز حکومته قارشیدیرلار، ایرانچیلیک و فارس فاشیزمینه ده‌ییل. میللی حرکتیمیز ایسه، بو عدالتسیزلیک‌لر و فلاکتین سببینی، ایلک باش‌دا، ایران دولتچیلی‌یی و اونون قورولوش فلسفه‌سی اولان فارس فاشیزمین‌ده، آردیندان دا بو گون فاشیزمین تمثیلی اولان جمهوری اسلامی‌ده گؤرور. بیزیم دشمنیمیز، ایران دولتی‌نین تامامی‌دیر و گونئی آذربایجانین تک قورتولوش یولو، ایران دولتین‌دن قورتولوب اؤز دولتینی قورماقدان گئچر. ائله بونا گؤره‌دیر کی ایرانا حاکیم اولان هر هانسی بیر حکومت، نه قدر گوجسوز، باجاریقسیز و مشروعیت‌سیز اولسا، بیر او قدر یاخشی‌دیر و گونئی آذربایجان میللی حرکتینین اوغورو و میللی دولتیمیزین قورلماسی‌نین هزینه‌سی ده او قدر آز اولار. ایرانا حاکم اولان رژیمین ییخیلماسی یا دا ده‌ییش‌مه‌سی، تک باشینا بیزی فلاکت‌دن قورتارماز. اونون یئرینه گلن هر حکومت، یئنه ده ایران‌چی‌لیق فاشیزمی ایله، آذربایجانی ازمه‌یه چالیشیب، اوندان داها فاشیست و عدالتسیز اولا بیلر.
گونئی آذربایجانی، میللی دولته لایق بیر میللت کیمی قبول ائتمه‌ین اوپوزیسیون تشکیلاتلاری و باشچی‌لاری ایله اورتاق پلان قوروب، برابر حرکت ائتمک معناسیزدیر و میللی حرکتیمیزه ضرر وئره‌ر. هر کس‌له آنلاشماق و اورتا یول تاپماق، هر زامان دوغرو بیر استراتژی ده‌ییل. قوزئیه گئتمک ایسته‌ین بیری، عینی زاماندان گونئیه گئده بیلمز یا دا گونئیه گئدن بیری ایله اورتاق یول پلانی قوروب حرکته گئچه بیلمز.
مجادله‌میز‌ین ایلرله‌مه‌سی اوچون لازم اولان یئرلرده، تورک دونیاسی تشکیلاتلاری، اولوسلار آراسی تشکیلاتلار، حتی ایران‌داکی باشقا میللت‌لرین تشکیلاتلاری ایله، ایلکه‌لریمیز و هدفیمیز دوغرولتوسوندا تاکتیکی کوردیناسیون‌لار ساغلانا بیلیر. آما هیچ بیر قوروم، قورولوش، تشکیلات، حزب و … نه قدر احاطه‌لی اولسا دا، گونئی آذربایجانین سرنوشتی و تورپاقلاری قونوسوندا، مرکزیت‌چی مخالفت و باشقا اتنیک‌لرین تشکیلاتلاری ایله مذاکره‌یه گیره بیلمز. چونکو نه اونلار گونئی آذربایجان میلتی‌نین تمامی‌نی تمثیل ائدیر، نه ده مرکزیت‌چی مخالفت و باشقا اتنیک‌لرین تشکیلاتلاری اؤز خالقلارینی تمثیل ائدیر. هیچ بیری ده منسوب اولدوقلاری خالقلارین طرفیندن قرار وئرجک ائتکی و یئتکی‌یه صاحب ده‌ییل‌لر. یالنیز گونئی آذربایجانی تمثیل ائدن بیر دولت اولدوغوندا، او دولت، باشقا دولت‌لر ایله مذاکره‌یه گیره بیلر و گونئی آذربایجانین تورپاقلاری و سرنوشتی ایله ایلگیلی قرار آلابیلر. بونون اوچون میللی دولتیمیز قورولانا قدر، گونئی آذربایجان میللی حرکتینه منسوب تشکیلاتلار و میللی فعاللار، یالنیز و یالنیز، گونئی آذربایجان میللی دولتی‌نین قورولماسی‌نا اوداقلانمالی‌دیر و اونا چاتماق اوچون مجادله ائتمه‌لی‌دیر.
میللی هدف‌دن جایماماق
