تورک‌چولوک بولوت قاراچورلونون دئیدیغی کیمی “اؤزگه چیراغینا یاغ اولماق بسدیر، دوغما ائللریمیز قارانلیقدادیر” دئییب، نورو اؤز ائلینه و خالقینا یوکسلت‌مک‌دیر. تورک‌چولوک داخلی و خارجی دشمن‌لره قارشی یالنیز قالمیش و تورک اولدوغو اوچون ازیل‌میش، گونئی آذربایجان تورکلرینی مدافعه ائدیب قورتولوش یولونو ایشیق‌لان‌دیرماق‌دیر. تورک‌چولوک ایلکه‌سی، اؤز کیم‌لی‌یینی سئومک، قوروماق و مدافعه ائتمک‌دیر، یعنی اؤزونه اینانماق‌دیر. تورک‌چولوک گونئی آذربایجانین بیر سوسیال حقیقتی‌دیر، اوندا نه ایشغال‌چی‌لیق وار نه ده عرق‌چی‌لیق. اوندا اؤزگووه‌ن وار، اومود وار و گلجک وار. تورک‌چولوک باشقا خالقلارا قارشی کین و غرض دویقوسو ده‌ییل، تورک خالقینا درین سئوگی و باغلیلیک‌دیر. تورک‌چولوک، گونئی آذربایجان تورک‌لرینین قورتولوشو و اؤزگور، مرفه، و مدرن بیر گلجه‌یی‌نین آرزوسو و دویغوسودور.
بیر تورک‌چو، میللی قهرمان‌لارینا حرمت ائدر، آما قهرمان اولمایانا دا قهرمان دئمز. تورک‌لویه خور باخیب، تورک دیلی و مدنیتینی اؤز چیخارلاری اوچون آلچالدان و یوخ سایانلاری، باغیش‌لاماز و اونلاری باغیشلایان‌لاری دا دشمن سایار. تورک‌چولویون ان بویوک وظیفه‌سی، تورک‌لویه خدمت‌دیر، بونون باشین‌دا دا اؤز اطرافین‌داکی‌لارا تورک‌لویو سئودیرمک گلیر. یورولمادان بیخمادان، تورک دیلی و مدنیتی‌نین گؤزللیک‌لرینی آنلادیب، اونون ان بؤیوک دشمنی ده، ایران دولتی و ایران‌چی‌لی‌غین اولدوغونو آچیقلاماق‌دیر. تورک‌چولوق آلچاق گؤنوللو اولماق‌دیر، بیر تورک‌چو، به‌یه‌نیل‌مک اوچون ده‌ییل، وظیفه بیلدیغی اؤچون تورک‌لره خدمت ائدر. اؤزونون یوکسل‌مه‌یی اوچون ده‌ییل، تورک‌لویون یوکسلمهسی اوچون هر جور فداکارلیغا حاضر اولار.
دیلیمیز، تاریخیمیز، تؤره‌میز، اینانجیمیز، عادت و عنعنه‌لریمیز، بیزی باشقا خالقلاردان آییریب، کیم‌لی‌ییمیزی و منسوب اولدوغوموز مدنیتی یعنی تورک‌لویوموزو تانیم‌لار. اؤزونو صمیمی اولاراق تورک مدنیت‌ینه باغلی حس ائدن هر کس تورک‌دور. بو آنلاییش‌دان یولا چیخیب، بوتون گونئی آذربایجان تورکلرینی دوشونوب، اونلارین خوشبخت‌لی‌یی اوچون چالیش‌مالی‌ییق. آسیمیلاسیون نتیجه‌سین‌ده تورک دیلینی آز بیلن، حتی هیچ بیل‌مه‌ین انسانلاریمیز دا بو ظالم سیستمین قوربان‌لاری‌دیر، اونلارین دا هارای هارای من تورکم دئمه‌یه و اونون خوشبخت‌لی‌یینی یاشاماغا حق‌لری واردیر.
بیز گونئی آذربایجان میللی فعاللاری، تورک اولدوغوموز اوچون و گونئی آذربایجان تورک‌لرینین ایچیندن چیخمیش انسان‌لار اولدوغوموز اوچون، تورک‌لرین یوکسلمهسی و حق‌لرینین هر شئی‌دن اوستون توتولماسی یولوندا چالیش‌ماغی، مقدس بیر وظیفه بیلیریک. تورک‌چولویه دایاناراق، میللتیمیزین میللی شعورونو یوکسل‌دیب، سیاسی‌لش‌دیریب و اؤز سرنوشت‌ینی تعیین ائتمک اوچون حرکته گئچیرمک، ان بؤیوک وظیفه‌میزدیر. بو دوغرولتودا تورکچه دانیشاجاغیق، تورکچه‌نی هر زامان هر شئی‌یین اوستونده توتاجاغیق، هر ایشیمیزده تورکون روحونا، تورکون اؤزل‌لی‌یینه اویغون و تورک میللتینه فایدالی اولما شرطینه دقت ائده‌جه‌ییک.
تورک‌چولوک
