پلان و تاکتیک‌لریمیز عمومیت‌ده “فرصت یاراد، فرصتی یاخالا و فرصتی یؤنت” فرم‌دا اولمالی‌دیر. فرصت‌لر فرقلی شکیل‌لرده یارانا بیلر. بعضا دشمن، بیلمه‌دن خطا ائدیب بیزه فرصت یارادا بیلر. دشمن خطا ائتدی‌یین‌ده، سؤزونو کسمه‌ییب، اونو بیر فرصت کیمی ده‌یرلندیرمه‌لی‌ییک. آنجاق بونو دا بیلمه‌لی‌ییک کی، اومود بیر استراتژی ده‌ییل، اوتوروب فرصت‌لری گؤزله‌مک اولماز. اصیل فرصت‌لری اوزوموز یارادمالی‌ییق. بیزیم هر زمان اوچون پلانلاریمیز اولمالی‌دیر و او پلانلاریمیز اساسیندا، سوسیال گوجوموزه دایاناراق، فرصت‌لر یارادیب، یؤنت‌مه‌لی‌ییک. استراتژی‌ده نه قدر گیزلی‌لیک و دقت اؤنم‌لی‌دیرسه تاکتیک‌لرده ده مشاهده و سرعت اؤنم‌لی‌دیر. فرصتی یاخالایب سئل کیمی آخمالی‌ییق. پلانلاریمیز چئویک و اویغونلاشان اولسا، هم بیر آددیم مقصده دوغرو ایلرله‌یه‌ریک، هم ده گوجوموزو آرتیریراریق. هر زامان اؤزوموز سئچدیغیمیز یئرده، اؤز زامانیمیزدا ساواش‌مالی‌ییک. کنترلی هر زمان اؤز الیمیزده توتوب، دشمنین الینه گئچمه‌سی‌نه اجازه وئرمه‌لی‌ییک. بونون اوچون فرصتی ده‌یر‌لن‌دیریب، آکسیایا گئچمه‌یی بیلدی‌ییمیز کیمی، بللی قازانج‌لار الده ائتدیکدن سونرا، گئری چکیل‌مه‌یی ده بیلیب، انسانلاریمیزین ان آز ضرر گورمه‌سینه ده دقت ائتمهلیییک.
یالنیز میللی حکومتین قورولماسی یا دا گونئی آذربایجانی باغیمسیزلی‌غینا آپاراجاق فرصت‌لری ده‌ییل، بیزی بیر آددیم ایله‌ری آپاراجاق هر فرصتی ده‌یرلندیرمه‌لی‌ییک. هر فرصت‌دن پلانلادیغیمیز قدر استفاده ائتدیکدن سونرا دوروب، یئنی بیر حرکت پلانلامالی‌ییق. اوزاق مسافه‌لره چاتماق، یاخین مسافه‌لره گئتمک‌له ممکن اولار. یوزلرجه فرصتی دوغرو یاخالاییب، دوغرو یؤنت‌دیک‌دن سونرا، گوج‌لنیب، میللی دولتی قورماغا حاضر اولاجاغیق. یئترینجه گوجلو و حاضرلیق‌لی اولساق، بؤیوک فرصت‌لر یاخالاییب یا دا یارادیب، بؤیوک حرکت‌لر باشلادا بیلریک. او زامان، تاریخی ده‌ییشیم‌لر، دنیانین گوج دینامیک‌لرین‌ده‌کی ده‌ییشیم‌لر، ساواشلار، گؤزله‌نیل‌مز حادثه‌لر، بؤیوک خالق عصیانلاری و بونا بنزر فرصت‌لری یاخالاییب، الیمیزده‌کی گوج و پلانلارمیز ایله، گونئی آذربایجان‌دا اداره‌چیلی‌یی اله گئچیریب، میللی حکومتی قورا بیلریک.
بوتون پلانلاریمیزدا و تاکتیک‌لریمیزده میللی حرکتیمیزین تابانی یعنی سوسیال بازا‌سینین قورون‌ماسینا دا دقت ائتمهلیییک. بیر حرکتین تابانی، اونو تمثیل ائدن سیاسی الیت و تشکیلات‌لار طرفیندن دستک‌لنیب، صاحب چیخیل‌مازسا، او حرکت و تابان کیتله‌یه، باشقالاری صاحیب چیخار و اؤز ایسته‌دیک‌لری جهت‌ده یؤن‌لن‌دیرر. بوتون فعالیت‌لریمیزده، تورک دیلینده و آذربایجان ایله ایلگیلی چیخیشلار و شعارلاریمیز اولمالی‌دیر. میللی حرکتی یانسی‌دان سمبول‌لار و بایراق‌لاری اؤنه چیخارمالی‌ییق. میللتیمیزین حرکت و آکسیالارینا صاحب چیخیب، ظفرلرینی( نه قدر کیچیک اولورسا اولسون) قید ائدیب قوتلامالی‌ییق.
