اؤزگورلوک چؤرک‌دن داها دادلی، گونش‌دن داها گوزل‌دیر. خوشبخت‌لیغین سیرری و تاریخین ایتیریل‌مه‌ین ده‌یری‌دیر. کیم اولدوغونو بیلیب، اولدوغون کیمی یاشاماق‌دیر. اؤزگورلوک یولدان چیخماق ده‌ییل، ایسته‌دیغین یولا گئتمک‌دیر، یعنی اؤز بئینین ایله دوشونوب، دوغرو اولدوغونا اینیاندیغین شئی‌لر اوچون موجادله ائتمک‌دیر. اؤزگورلوک بیر بوتون‌دور، اونا شرط قویولماز و تمامی ایله قازانیلانا قدر هیچ قازانیل‌مامیش‌دیر. میللیت اؤزگورلوغو، جنسیت اؤزگورلوغو، اینانج اؤزگورلوغو، دوشونجه اؤزگورلوغو و حتی حیوان‌لارین اؤزگورلوغو، بیر بوتون‌دور و بیربیرینه باغلی‌دیر. اونلارین هامیسی و هامی اوچون تامین اولانا قدر، هیچ کیم اؤزگور ده‌ییل‌دیر. اؤزگورلوک بیر حق ده‌ییل، بیر انسان‌لیق وظیفه‌سی‌دیر. کیچیک چیخار و وعده‌لره آلدانیب اوزگورلوغونون تمامی و یا بیر قیسمینی ترک ائدن انسان، اصلینده انسان‌لیغین‌دان و وظیفه‌لرین‌دن ال چک‌میش‌دیر.
هر تبعیض اؤزگورلوغه بیر سالدیری و فلاکت‌لرین اساس سببی‌دیر. تبعیض‌لرین قایناغینی بیلمه‌دن اؤزگورلوک اولماز و نه قدر مجادله ائدسک ده، اونون سبب اولدوغو فلاکت‌لردن قورتولماق اولماز. گونئی آذربایجان میللتی، تورک اولدوغو اوچون، تبعیض‌لره، تحقیرلره و دیش‌لان‌مالارا معروض قالیب، فلاکت‌لره دوشوب‌دور. بونون اوچون گونئی آذربایجان تورک‌لرینین، اسارت زنجیرلرین‌دن قورتولوشو و اؤزگورلوغو، آنجاق تورک‌لویونه ساریلیب، میللی دولتینی قوروب، اؤزو اؤزونو اداره ائتمک‌له ممکن‌دیر. میللی دولتیمیز اولمایانا قدر و اؤزوموز اؤزوموزو اداره ائتمه‌ینه قدر، آزاد اولا بیلمه‌یه‌جه‌ییک. تبعیض‌لر، تحقیرلر و دیش‌لان‌مالار دوام ائده‌جک و فلاکت‌لر ایچینده یاشاییب، اؤزگور اولمادیغی اوچون محو اولان باشقا میللت‌لر کیمی، محو اولاجاغیق.
بیزیم اؤزگورلوک مجادله‌میز، گئچمیش‌دن گلن ان ده‌یرلی خزینه‌میز‌دیر. بیز بیر عمر تحقیر و فلاکت ایچینده یاشاییب اؤلمک یئرینه، شرف و حیثیت‌یمیزله اؤزگورلوغوموز اوچون ساواشیب بو یولدا اؤلمه‌یی ترجیح ائدریک. آما بونو دا بیلیریک کی بوتون گوج و اراده‌سی‌له اؤزگورلوک مجادله‌سی ائدن بیر میللتین قارشی‌سیندا هیچ بیر گوج دایانا بیلمز. گونئی آذربایجان میللی فعاللاری، اوزگورلوک و عدالت مجادله‌لرین‌ده، کؤله اولماغی و باشقالارینی کؤله ائتمه‌یی قبول ائتمه‌ین، شرفلی بیر بایراغین داشی‌ییجی‌لاری‌دیرلار. اونلار، اوغروندا اؤلونه‌جک قدر دیرلی و حق‌لی داوامیزی، جسارت، اورک‌لی‌لیک ،آتیلقان‌لیق و ایلکه‌لریمیزه ساریلاراق، هدفه دوغور آپارماغی، بیر انسان‌لیق وظیفه‌سی بیلن قهرمان‌لاریمیزدیر.
یوز ایل‌دن چوخدور گونئی آذربایجانی بوش وعده‌لر ایله آلداتیب مشغول ائدیب‌لر. گلین بیرلیک‌ده ایران حکومتینه قارشی ساواشیب اونو اصلاح ائدیب یا دا دییش‌دیریب، داها دموکراتیک ائده‌ک، سونرا آذربایجانین پایینی دا آلاریک دئییب‌لر. یوز ایل‌دن چوخدور ان بویوک دردیمیز یعنی اؤزگورلوغوموزون اوغورلان‌دیغینی، دولت‌سیزلی‌ییمیزی و اشغال آلتیندا اولدغوموزو اونودوب، کیچیک دردلر ایله اوغراشیب بوغولوب قال‌میشیق و هر دفعه قازاندیق دئدی‌ییمیزده گؤرموشوک کی، اصلینده اونلار قازانیب بیز مغلوب اولموشوق. آرتیق بؤیوک داوامیز، یعنی گونئی آذربایجان اوچون میللی دولت قورما و قورتولوش موجادله‌سی‌نین زامانی چوخدان گل‌میش‌دیر. بیز گونئی آذربایجان میللی حرکتی اولاراق بیر داها کیچیک دردلر اوغرونا آماجیمیزدان گئچ‌مه‌یه‌جه‌ییک. بیر داها هیچ بیر تاکتیکی و کیچیک باشاریلار اوغرونا دولت قورما هدفیمیز و ایلکه‌لریمیزدن یعنی کیملی‌ییمیزدن، اؤزگورلوغوموزدن، تورک‌لویوموزدن و وطنیمیزدن گئچ‌مه‌یه‌جه‌ییک. گؤره‌جه‌ییمیز ایش باشاریسیز اولاجاقسا اولسون. باشاریسیزلیق اؤلوم‌جول ده‌ییل، اؤنم‌لی اولان دوام ائتمه جسارتینی گؤسترمک‌دیر. حاقلی مجادله‌میز، بیر نئچه یانلیش و باشاریسیز ایش ایله مغلوب اولماز. بیز باشاریسیز اولدوغوموزدا ده‌ییل، واز گئچ‌دیغیمیزده مغلوب اولوروق.
